Фудбалерот на Наполи и шкотски репрезентативец Скот МекTоминеј ќе мора да се подложи на операција поради проблеми со срцевиот ритам, потврди италијанскиот клуб.
На 29-годишниот играч од средниот ред му е дијагностицирана срцева аритмија, за што ќе се подложи на хируршка интервенција во наредните денови. Како што е најавено, процедурата ќе се изврши со минимално инвазивен метод на пулсна аблација.
Според првите проценки, МекTоминej нема да биде долго отсутен од теренот. Се очекува да го пропушти периодот до првата репрезентативна пауза, а доколку закрепнувањето оди според планот, би можел повторно да биде достапен за Наполи во октомври.
Тоа значи дека ќе ги пропушти и четирите натпревари на Шкотска во Лигата на нации. Шкотите се во група заедно со Македонија, па македонските фудбалски гурмани нема да можат да го гледаат во Скопје на 3 октомври. Ќе ги пропушти уште и натпреварите со Словенија (гости и дома) и со Швајцарија (дома).
Проблемот со шкотскиот интернационалец се појавил за време на неделниот првенствен натпревар против Комо. МекTоминej го напушти теренот во втората половина од натпреварот, кој Наполи го загуби со 2:1, по што му биле извршени дополнителни медицински прегледи.
Nota medica | McTominay 👇https://t.co/oFwK9piB9j
— Official SSC Napoli (@sscnapoli) September 1, 2026
Неговото отсуство ќе биде значаен удар за Наполи, со оглед на тоа што МекTоминej стана еден од најважните играчи на тимот во текот на изминатите сезони.
Шкотланѓанецот особено блескаше во сезоната 2024/2025, кога одигра една од клучните улоги во освојувањето на шампионската титула од страна на Наполи. Одличните игри му донесоа признание за најдобар играч во Серија А за таа сезона.
МекTоминej потоа продолжи да игра важна улога во шкотската репрезентација, за која играше и на Светското првенство во 2026 година.
Од своето доаѓање во Наполи кон крајот на август 2024 година одигра 82 натпревара во сите конкуренции, постигна 27 голови (22 во Серија А) и запиша 10 асистенции.
