Лука Модриќ летово ќе биде нов играч на Милан, но калчолигашот не бил негово прва опција, открива еден американски магазин.
Лука Модриќ ги игра своите последни натпревари за Реал. Капитенот на мадридскиот гигант ќе го напушти клубот по Светското клупско првенство, а потоа, според најавите и очекувањата, ќе потпише договор со Милан. Американскиот спортски магазин Sports Illustrated пишува дека неговата желба била да оди во МЛС и да им се придружи на Лионел Меси, Луис Суарес, Жорди Алба, Серхио Бускетс и тимот на Интер Мајами, но дека бил одбиен.
Како што е наведено во текстот, Интер Мајами сака уште една ѕвезда во својот тим и му биле понудени три такви. Претставници на Лука Модриќ, Кевин Де Брујне и Нејмар го контактирале клубот за евентуален трансфер, но сите биле одбиени. Де Брујне ќе игра за Наполи, а Нејмар за Сантус.
„Покрај новите договори за своите ѕвезди, косопственикот на Интер Мајами, Хорхе Мас, отворено разговараше за додавање на уште еден играч во составот на клубот. Гијом Балаг од BBC Sport сензационално тврдеше дека агентите на Модриќ, иконата на Реал Мадрид во заминување, го предложиле и го контактирале Интер Мајами за да разговараат за потенцијален трансфер откако станало јасно дека нема да остане во шпанската престолнина.
Договор не е постигнат и Милан е на работ да го потпише играчот откако ќе го заврши Светското клупско првенство со Мадрид“, се истакнува во статијата.
Модриќ е легенда на Реал, најтрофејниот играч во историјата на клубот, со кого освои клупски рекордни 28 трофеи и одигра 594 натпревари, а си заминува по 13 години. Својот 40-ти роденден ќе го прослави во септември.
