Црногорскиот стратег ќе го гаси огнот во паднатиот шампион Вардар кој разочарувачките настапи во Европа ги круниса со 7 од можни 15 бодови во домашната лига.
Миодраг Божовиќ, познат како Гроф, е новиот шеф на стручниот штаб на ФК Вардар, соопшти клубот, информирајќи дека со него „Црвено-црните“ потпишале договор до летото 2028 година.
Поранешниот дефанзивец тренеската кариера ја започна во 2001 година, една година откако ги закачи копачките. Има водено бројни клубови, а од попознатите се московските Динамо и Локомотив, Ростов, Амкар, Арсенал од Тула, Крилја Совјетов, азербејџански Нефтчи, ирански Естеглал и последно подгорички Будучност, од каде си замина во мај годинава.
Има освоено две титули и тоа шампион на Србија со Црвена звезда во 2015/2016 и освојувач на Рускиот куп со Ростов во 2013/2014.
Неколкумина играчи што имаат тренирано под негова палка велат дека често на тренинзите знаел да употребува секс шеги, пишуваат руските медиуми Бо спорт, Meta Ratings и Cпорт-Экспресс.
По спогодбениот раскин на договорот со Аргентинецот Кристиан Фабиани, тимот изминатите три кола го водеше Матија Марков како в.д. тренер. Вардар имаше разочарувачки настап во Лигата на шампионите со Фабиани испаѓајќи уште во првото коло од фински КуПС, а потоа ниту во Конференциската лига не успеа да мине откако беше елиминиран од латвиска Рига. Дома, пак, почна со победа над Брегалница, но следуваше пораз од Шкендија среде Скопје, по што дојде до раскинот со Фабиани. Се продолжи со пораз на гости кај Струга, потоа победа дома со Силекс и реми на гости кај Тиквеш.
На Божовиќ во стручниот штаб ќе му помагаат неговиот сонародник Дејан Мрваљевиќ и тренерот на голманите Гого Јовчев, како нови лица покрај останатите тренери.
Вардар утре игра куп натпревар против третолигашот Овче Поле во Свети Николе, а потоа в понеделник во рамките на 6. коло од првата лига го пречекува Арсими.
