Неделниот бараж за пополнување на првата лига нема да се игра на стадионот во скопската населба Чаир, туку во Кавадарци.
Фудбалската федерација на Македонија (ФФМ) информира дека, согласно денешното известување и барање од страна на Министерството за внатрешни работи, како и по итниот состанок кој се одржа меѓу претставници на ФФМ и МВР, донесена е одлука за промена на локацијата на бараж натпреварот за пласман во 1.МФЛ, соопшти Федерацијата.
Така, натпреварот Беса 1976 - Башкими 1947 ќе се одигра на 25 мај (недела) со почеток во 17:00 часот на Градскиот стадион во Кавадарци.
„Оваа одлука е донесена со цел натпреварот да се организира во услови, во согласност со проценките на безбедносните органи. ФФМ изразува благодарност за соработката со Министерството за внатрешни работи и ги повикува сите навивачи на фер и спортско навивање“, порачаа од ФФМ.
Ова значи дека Кавадарци викендов ќе биде домаќин на два натпревараи, со огелд на тоа што в сабота на истиот стадион се игра баражот меѓу Осогово од Кочани и Шкендија 77 од Арачиново за пополнување на втората лига.
Сите баражи од ФФМ се прогласени за висок ризик, а за Кајгана потврдија дека билети нема да се продаваат пред стадионите, туку истите се поделени на клубовите и тие ги продаваат на своите навивачи и симпатизери.
