Напаѓачот на Ирак 7 часа бил испрашуван на аеродромот во Чикаго

Ирачкиот напаѓач Ајмен Хусеин беше задржан и испрашуван речиси 7 часа на Меѓународниот аеродром „О’Хара“ во Чикаго откако пристигна со репрезентацијата на Светското првенство. На Хусеин конечно му беше дозволено да влезе во Соединетите Држави, но на фотографот на тимот му беше забранет влез во земјата.

Според ирачки спортски службеник близок до репрезентацијата, телефонот на Хусеин бил проверен по пристигнувањето. По речиси седумчасовно испрашување, конечно му било дозволено да влезе во земјата.

Ирачката фудбалска асоцијација и самиот Хусеин, харизматичниот играч чиј гол му го обезбеди местото на Ирак на првенството, сè уште не го коментирале инцидентот.

Службата за имиграција и царина на САД, како и Министерството за внатрешна безбедност, не одговорија веднаш на барањата за коментар за настанот.

30-годишниот Хусеин има 94 настапи за Иран и постигато 33 гола, а настапува за Ал-Карма во домашната ирачка лига.

За разлика од Хусеин, фотографот на репрезентацијата, Талал Салах, не доби дозвола за влез во САД. Службеникот додаде дека Салах бил задржан повеќе од 10 часа и дека неговиот телефон бил проверен пред конечно да му биде одбиен влезот.

И покрај инцидентот, пристигнувањето на националниот тим предизвика ентузијазам кај навивачите кои се собраа на аеродромот во раните утрински часови за да ги поздрават своите херои. Ирак се враќа на Светското првенство за прв пат по своето деби пред 40 години.

Триесетгодишниот Хусеин предводи силна напаѓачка линија во која се и Али Ал-Хамади од Ипсвич Таун и талентираните млади Али Xасим (саудиска Ал-Наџма) и Јусеф Амин (кипарски АЕК).

Ирак е во групата И каде ќе игра против Франција, Сенегал и Норвешка. Првиот меч му е на 17 јуни точно на полноќ по македонско време (16 јуни во 21 часот по локално) против Норвешка во Фоксборо, Масачусетс.

Ирак одигра 1:1 на пријателската со Шпанија на 4 јуни во Ла Коруња а последната проверка ќе ја има утре против Венецуела во Бриџвју близу Чикаго, Илиноис.