Францускиот фудбалер Пол Погба, чија суспензија поради допинг неодамна истече, преговара со ДиСи Јунајтед од Вашингтон, клуб кој има ексклузивни права за разговори со светскиот шампион од 2018 година, објавија американските медиуми.
Според Washington Post и Athletic, тимот на Погба преговара со клубот од американската престолнина, поради т.н. правило за „откривање“ во рамките на МЛС, специфично за северноамериканското првенство.
Еден клуб може да стави до пет играчи на „листата на откритија“ со кои има ексклузивни права на преговори. Барањето за ставање на играч на оваа листа го одобрува МЛС, која мора да процени дали клубот има финансиска можност и доволно простор во тимот да го доведе играчот.
„Клубот во овој момент нема коментар за шпекулациите за трансфери“, изјави претставник на ДиСи Јунајтед за агенцијата France Presse.
Погба, поранешен играч на Манчестер Јунајтед и Јувентус, нема играно фудбал од септември 2023 година, кога беше суспендиран поради позитивен тест на забранетиот тестостерон.
32-годишниот француски фудбалер живее во Мајами, каде што тренира индивидуално во очекување на трансферот.
