Познати се уште 6 учесници на Мундијалот, остануваат 20 места

По вчерашните натпревари имаме 6 нови учесници на Светското првенство 2026, кое ќе се одржи во Канада, САД и Мексико.

Англија стана првиот квалификант од Европа откако ја победи Латвија на гостински терен со убедливи 5:0, а во ноември ќе дознаеме кои ќе бидат уште 11 учесници од Стариот континент, по што ќе следат преостанатите 4 во баражот.

Саудиска Арабија и Катар се квалификуваа како седма и осма азиска репрезентација.

Саудиска Арабија ремизираше 0:0 со Ирак, што им беше доволно за да се квалификуваат на Светското првенство поради подобрата гол-разлика, додека Катар ги победи Обединетите Арапски Емирати со 2:1, прескокнувајќи ги на табелата и обезбедувајќи го своето место на Светското првенство.

Вчера, на Светското првенство заминаа и три африкански репрезентации, со што бројот на тимови од тој континент кои се квалификувале на Светското првенство се искачи на 9.

Јужна Африка го обезбеди своето место со победа од 3:0 над Руанда, Сенегал со победа од 4:0 над Мавританија, а Брегот на Слоновата Коска со победа од 3:0 над Кенија.

Засега, на Светското првенство ќе учествуваат домаќините Канада, САД и Мексико, како и Мароко, Тунис, Египет, Алжир, Гана, Зелен ’Рт, Јужна Африка, Сенегал, Брег на Слоновата Коска, Јапонија, Иран, Јордан, Узбекистан, Јужна Кореја, Австралија, Саудиска Арабија, Катар, Нов Зеланд, Аргентина, Бразил, Еквадор, Уругвај, Парагвај, Колумбија и Англија.

Досега има три дебитанти и тоа Јордан, Узбекистан и Зелен ’Рт, како и неколку повратници како Јужна Африка, Нов Зеланд и Парагвај кои последен пат учествуваа во 2010, Алжир и Брег на Слоновата Коска со последно учество во 2014, а Колумбија и Египет во 2018. Сите останатитем, вклучително и трите кодомачини, учествуваа на собирот во Катар 2022.

Останува да ги дознаеме уште 15 репрезентации од Европа, 3 од Северна и Централна Америка, а 2 преку меѓуконтинентални бараж натпревари закажани за март 2026.