Претставена топката за Мундијалот 2026, специјални сензори ќе им помагаат на судиите

Adidas официјално ја претстави топката што ќе се користи на Светското првенство 2026 во Канада, САД и Мексико.

Новата топка се вика Trionda, што на шпоански значи „три брана“. Веќе привлече големо внимание поради својот иновативен дизајн и технологија.

Trionda се издвојува бидејќи е составена од само четири панели, најмалку во мундијалската историја. Токму овој минимализам носи совршена аеродинамична форма и попрецизно движење во воздухот, а во исто време обезбедува стабилност и контрола за време на играта.

Дизајнот на топката е инспириран од земјите домаќини, со бела позадина на која доминираат црвени, зелени и сини детали, бои што ги симболизираат Канада, Мексико и Соединетите Американски Држави.

Посебна димензија на топката ѝ дава и connected ball technology (технологија на поврзана топка) - вградени сензори што го следат секој допир, брзина и траекторија на топката. Според најавите, системот ќе ги регистрира движењата на топката 500 пати во секунда, што ќе овозможи попрецизна анализа на играта, но и ќе им помогне на судиите во контроверзни ситуации.

Претходно беа претставени и трите мундијалски маскоти.

За потсетување, Светското првенство ќе се игра во Канада, Соединетите Американски Држави и Мексико од 11 јуни до 19 јули 2026 година, а ќе учествувата рекордни 48 репрезентации. Досега пласман на завршницата покрај трите домаќини имаат обезбедено и Аргентина, Бразил, Колумбија, Еквадор, Парагвај, Уругвај, Австралија, Иран, Јапонија, Јордан, Јужна Кореја, Узбекистан, Мароко, Тунис и Нов Зеланд.