Прво синот на Зидан, сега брат му на Мбапе: Алжир си ја собира дијаспората

Алжирската репрезентација, која веќе обезбеди пласман на Светското првенство 2026, продолжува со својот план за засилување на тимот за претстојните предизвици.

Откако во септември се засили со нов голман, Лука Зидан од Гранада, син на легендарниот Зинедин Зидан, сега фокусот се префрла на нови засилувања.

Најновиот член на Алжир е Елиас Бенкара, 18-годишен стопер од вториот тим на Борусија Дортмунд, кој претходно играше за младинската репрезентација на Германија до 17 години.

Но, се чини дека тоа не е крајот на приказната. Според порталот Fennec Football, повикувајќи се на сигурни извори, Алжирската фудбалска федерација се обидува да го убеди Итан Мбапе, помладиот брат на француската ѕвезда Килјан Мбапе, да ја прифати поканата и да го облече дресот на „Пустинските лисици“.

Според истиот извор, Федерацијата веќе ја контактирала мајката на Итан, Фајза Ламари, која е Алжирка, со цел да добие државјанство за младиот напаѓач на Лил и да го стави на располагање на тренерот Владимир Петковиќ по завршувањето на Африканскиот куп на нации, кој започнува на 21 декември.

Итан во декември ќе полни 19 години и досега нема настап за Франција, ниту за било која од младинските репрезентации.

„ФАФ не само што сака да го зајакне тимот, туку и да испрати силна порака до алжирската дијаспора и светот на фудбалот“, наведува Fennec Football, нагласувајќи дека доаѓањето на синот на Зидан и можноста за ангажирање на Итан Мбапе би симболизирале нова ера во националниот тим.

„Целта е јасна: да се зајакне репрезентацијата со млади таленти од алжирско потекло и со тоа да се обезбеди силна и конкурентна генерациска транзиција пред Африканскиот куп на нации во 2025 година и Светското првенство во 2026 година“, заклучува Fennec Football.

Семејството Мбапе се Камерунци по татко, но Алжирци по мајка, а се родени во Франција.