Иван Ракитиќ (37) во недела ќе се збогува со фудбалот по натпреварот меѓу Хајдук и Шибеник.
Легендарниот играч од средниот ред и поранешен хрватски репрезентативец беше снимен како седи и плаче по вчерашниот натпревар на „Пољуд“, а сега е познато значењето на тие солзи. Тоа беше неговиот последен натпревар пред домашната публика во Сплит и претпоследен во неговата кариера.
Ова го наведува Dalmatinski portal, во чиј текст се нагласува дека Ракитиќ сè уште официјално не ја соопштил одлуката, но дека донел одлука според која неговата кариера е завршена.
Ракитиќ пристигна во Хајдук летоска и стана еден од најголемите фудбалери кои играле во националниот шампионат на Хрватска. Постигна 2 гола и 5 асистенции во 38 настапи за клубот од Сплит.
Хрватот е легенда на Севиља, имаше брилијантна кариера и во Барселона, пред 20 години стапна на теренот како играч на Б тимот на Базел. Од 2007 година беше и член на првиот тим на швајцарскиот клуб, пред да замине во Шалке 04. По четири сезони во Бундеслигата се пресели во Севиља. Од Андалузија замина во Барселона, со која ги освои Ла Лига, Купа дел Реј и Лигата на шампионите. Играше заедно со Иниеста, Меси, Суарес, Бускетс, Нејмар… За Барса одигра 310 натпревари.
Од Барселона повторно се врати во Севиља, со која го повторни успехот од 2014 година и во 2023 го освои трофејот во Лига Европа. По кратка епизода во Ал-Шабаб, минатото лето пристигна во Хајдук каде настапува заедно со нашиот репрезентативец Александар Трајковски.
