Рикелме: Ако станам претседател, Халанд и Родри ќе играат за Реал

Претседателската трка во Реал Мадрид се интензивираше во средата откако конкурентските кандидати ги извлекоа своите најсилни адути. Енрике Рикелме вети дека ќе ги доведе Ерлинг Халанд и Родри ако победи на изборите, додека неговиот противник Флорентино Перес потврди дека ќе го врати Жозе Мурињо ако победи.

Членовите на клубот, познати како „сосиос“, в недела ќе избираат помеѓу 37-годишниот претприемач за обновлива енергија Рикелме и 79-годишниот Перес, кој го водеше клубот 23 од последните 26 години. Ова е прв вистински избор со повеќе кандидати во клубот од 2006 година и доаѓа по две сезони без голем трофеј.

Во гостувањето во популарната емисија El Hormiguero на телевизијата Antena 3, Рикелме даде смело ветување. Откако претходно ги најави клупските легенди Раул Гонзалес за спортски директор и Фернандо Иеро за директор на академијата, сега отиде чекор понатаму. Тој тврди дека ќе ги плати сите членарини на клубот за следната сезона доколку не успеат да ги потпишат Халанд и Родри од Манчестер Сити.

„Потпишав гаранција дека ќе платам 100 проценти од членарините за следната сезона доколку го прекршам моето ветување да потпишам со некој од овие играчи“, рече Рикелме. „Халанд има откупна клаузула и сака да дојде во Мадрид“.

Таборот на Халанд одговори кратко потоа. Во заедничка изјава, таткото на норвешкиот напаѓач, Алфи Халанд, и неговиот агент, Рафаела Пимента, негираа дека е постигнат каков било договор. 

„Сето тоа е многу забавно, но не е вистина. Им посакуваме на двајцата кандидати среќа на изборите во Мадрид“, рекоа тие.

Халанд има договор со Манчестер Сити до 2034 година. Извори за ESPN изјавија дека договорот е потпишан во јануари 2025 година и е еден од најпрофитабилните во историјата на спортот. ESPN, исто така, објави дека новиот договор ги отстранува клаузулите за откуп што беа на сила во неговиот претходен договор откако се приклучи од Борусија Дортмунд во 2022 година.

Рикелме минатата недела за ESPN изјави дека освојувачот на Златната топка, Родри, чиј договор со Манчестер Сити истекува за една година, е „тип на играч кој треба да игра за Реал Мадрид“.

Тој го повтори тоа во средата: „Тој е одличен играч на позиција каде што Мадрид треба да се зајакне. Разговаравме со неговиот агент, мора да го почитуваме неговиот клуб, но ако станам претседател, тој ќе игра за Мадрид. Ќе направам сè што е можно“.

Во меѓувреме, кампањата на Флорентино Перес потврди на социјалните медиуми во средата вечерта дека Жозе Мурињо ќе се врати на клупата ако Перес победи на изборите в недела. 

Мурињо претходно го водеше Реал Мадрид од 2010 до 2013 година. Неговото враќање беше објавено во кратко видео во кое насмеаниот Мурињо, облечен во дрес на Реал Мадрид, изговара само „да“.

Мурињо контактирал со раководството на Бенфика, клубот што сè уште го тренира, за да ги увери дека не снимил видео на кое се појавува во дрес на Реал Мадрид. Тренерот тврди дека станува збор за снимка создадена со помош на вештачка интелигенција, пишува португалски Record. 

Во разговор за Diario AS, Перес го соопшти и неговото прво големо засилување. Тој потврди дека Ибрахим Конате, кој стана слободен агент откако го напушти Ливерпул, ќе се приклучи на клубот под негово водство. ESPN во вторникот објави дека Мадрид е блиску до договор со францускиот дефанзивец.

„Еден од најдобрите дефанзивци во светот, Конате, ќе игра за Реал Мадрид следната сезона“, изјави Перес за Diario AS. „И тој нема да биде единствениот одличен дефанзивец што ќе пристигне ако останам на чело“.