Македонската репрезентација вчера во Брисел ги доби противниците за петта сезона од Лигата на нации, во која ќе дебитира во втората по силина лига, Б.
За жрепката во Лига Б задолжен беше поранешниот француски репрезентативец Патрик Виера, кој Македонија ја смести во Групата 1 заедно со Шкотска, Швајцарија и Словенија.
Новиот селектор Гоце Седлоски, кој беше присутен на жрепката во Брисел, има голема почит кон репрезентациите со кои ќе се соочиме, но и верба во своите избраници кои можат да докажат дека Македонија сосема заслужено се наоѓа во втората по ранг лига.
„Шкотска и Швајцарија се главните фаворити во групата. Станува збор за две селекции со континуитет на настапи на големи натпреварувања, учесници и на претстојното Светско првенство. Имаат квалитет и искуство на највисоко ниво. Тоа доволно зборува за предизвикот што нè очекува. Но, ние не влегуваме во овој циклус со улога на аутсајдер. Нашата цел е да бидеме конкурентни на секој натпревар, без разлика дали играме дома или на гости. Ќе се трудиме да го наметнеме нашиот стил на игра, дисциплиниран, организиран и храбар. Да покажеме дека Македонија со право е дел од Лига Б. Имаме генерација која веќе е зрела, имаме јасна идеја како сакаме да изгледаме на теренот и треба да веруваме во квалитетот. Со максимален фокус, посветеност и тимски дух, верувам дека можеме да одговориме на предизвикот“, изјави Седлоски за жрепката.
Шкотска ни е стар познаник со која имаме 4 пати играно, Словенија сито така со дури 7 одиграни натпревари, додека Швајцарија е една од петте европски репрезентации со кои нашата репрезентација досега никогаш не се има сретнато (другите се Грција, Сан Марино, Франција и Северна Ирска).
Новата сезона почнува со првото коло од 24 до 26 септември годинава, а лигашката фаза ќе заврши со шестото кое ќе се игра од 15 до 17 ноември.
