Фудбалерите на Ал Хилал се пласираа во четвртфиналето на Светското клупско првенство, откако утрово во Орландо го победија Манчестер Сити со 4:3 по продолженија.
Сити добро го отвори натпреварот и поведе во 9-тата минута преку Бернарду Силва. Англискиот тим доминираше во остатокот од првото полувреме, но не успеа да постигне втор гол.
Казната за промашувањата дојде на почетокот на второто полувреме, кога Ал Хилал го сврте резултатот со головите на Маркос Леонарду и Малколм.
Три минути подоцна, Ерлинг Халанд израмни на 2:2, а тоа беше резултатот од регуларниот дел.
Следуваа продолженија во кои видовме три гола. Прво, Кулибали го врати Ал Хилал во водство, а Фил Фоден одговори на другата страна.
Конечните 4:3 ги постави енергичниот Маркос Леонарду во 112-тата минута од натпреварот.
Ал Хилал ќе игра против Флуминенси во четвртфиналето на Светското клупско првенство. Бразилскиот тим синоќа сензационално го елиминираше Интер со 2:0. Овој натпревар ќе се игра в петок во 21:00 часот.
