Серија А ги одложи саботните натпревари поради погребот на папата Франциск

Во сабота нема да има фудбал ширум Италија поради погребот на папата Франциск, соопшти денеска министерот за цивилна заштита Нело Месумечи по заедничката средба со претставници на Италијанската фудбалска федерација (ФИГЦ).

Како што е најавено, натпреварите од Серија А закажани за сабота, Комо - Џеноа, Интер - Рома и Лацио - Парма ќе бидат одложени. Медиумите објавија дека дуелите Комо - Џеноа и Лацио - Парма најверојатно ќе се играат во недела или понеделник, додека останува да се види кога на терен ќе излезат Интер и Рома, бидејќи актуелниот лидер го игра првиот полуфинален натпревар од Лигата на шампионите против Барселона следната среда.

Исто така, донесена е одлука утре од 18:30 до 20:30 часот да се играат натпреварите од 33. коло во Серија А, кои беа планирани за понеделникот, но беа одложени поради смртта на папата. Станува збор за натпреварите Торино – Удинезе, Џеноа – Лацио, Парма – Јувентус и Каљари – Фиорентина.

Утревечер од 21 часот според планираното се игра реваншот меѓу Интер и Милан (прв натпревар 1:1) во полуфиналето на Копа Италија.