Швајцарија на пенали ја елиминираше Колумбија и закажа четвртфинален дуел со Аргентина

Швајцарската репрезентација е последниот четвртфиналист на Светското првенство, откако ја елиминираше Колумбија по изведување на пенали. Регуларните 90 минути, а потоа и продолженијата, завршија без голови, а на пенали беше 4:3.

Како што и се очекуваше, имаше одлична борба од првата до последната минута. Рововска битка. Се чекаше повеќе од 20 минути за првиот шут, а потоа по една одлична шанса на двете страни.

Густаво Пуерта ја имаше првата одлична шанса за Колумбија, но неговиот шут во далечниот агол од швајцарскиот гол беше брилијантно одбранет од Грегор Кобел.

Швајцарија одговори со обид на Фабиан Риедер, но колумбискиот голман Камило Варгас исто така одговори со одлична интервенција.

Резултатот остана непроменет до полувремето, а потоа Швајцарија го промени својот пристап кон играта и нападна многу подобро.

Прво Џибрил Соу шутираше покрај голот веднаш по почетокот на второто полувреме, а Риедер речиси постигна гол од слободен удар во 53. минута.

Колумбијците можеа да постигнат гол достоен за триумф 10 минути подоцна, но Луис Суарес од работ на шеснаесетникот шутираше крај голот.

Како што натпреварот се приближуваше кон крајот, темпото на играта се забави, а ниту еден тим не сакаше да ризикува и да напаѓа.

И така се отиде во продолженија, а потоа дојде сензацијата. И двата тима неочекувано се отворија и имаше многу повеќе шанси отколку во регуларните 90 минути.

Грмеше од сите страни, Колумбијците ја погодија пречката и беа многу поопасни. Имаа уште две одлични шанси, но Кобел го сочува голот на Швајцарија.

Колумбија ја пропушти најдобрата шанса на натпреварот во 115-тата минута. Хаминтон Кампас начека грешка на швајцарската одбрана и тргна пред голманот Кобел, но шутна високо над голот. Едно од најзначајните промашувања на Светското првенство, дефинитивно, ако ја земеме предвид важноста на ситуацијата и одличната шанса, каква што беше.

Немаше голови до крајот на продолженијата, а потоа започна изведувањето на пенали.

Тука Швајцарците подобро се снајдоа, победувајќи со 4:3. Трагичари беа Давинсон Санчес, кој ја погоди пречката, како и Кучо Ернандес, чиј удар беше брилијантно одбранет од голманот Кобел. Единствено Мануел Аканџи промаши кај Швајцарија, шутирајќи над голот, но и тоа беше доволно за Швајцарија да се пласира во четвртфиналето и да закаже дуел со Аргентина.

Швајцарците, практично, ѝ се одмаздија на Колумбија за поразот од 2:0 на Мундијалот во 1994 година во САД, кога Колумбијците иако веќе испаднати ја зафркнаа Швајцарија да не биде прва во групата.

Ова е значаен успех за Швајцарија ако се знае фактот дека последен пат четвртфинале на Светско играа во далечната 1954 година, кога беа домаќини на турнирот. Тогаш, во еден од најлегендарните мундијалски натпревари беа елиминирани од соседна Австрија со неверојатни 7:5.

Натпреварот Аргентина - Швајцарија ќе се игра ноќта од сабота кон недела во 3 часот наутро по наше време.