Тренерот на Атлетико Мадрид, Диего Симеоне, јавно им се извини на Винисиус Жуниор и на Флорентино Перес, ѕвездата и претседателот на Реал Мадрид.
Симеоне јавно им се извини на Винисиус и Перес за неговото однесување за време на полуфиналниот натпревар од шпанскиот Суперкуп.
Да потсетиме дека во првото полувреме, Симеоне, вознемирен од симулираниот фаул на Винисиус, се приближи до аут-линијата и, според толкувањето на коментаторите на Movistar, извикал: „Флорентино ќе те избрка, запомни што ти велам!“, а потоа во 81-та минута, кога напаѓачот на Реал Мадрид ја напушташе играта, избувна уште еден вербален конфликт помеѓу Бразилецот и Аргентинецот.
Винисиус фрли нешто кон Симеоне, а тренерот на Јорганџиите одговори покажувајќи кон трибините и кажувајќи му да ги слуша свирежите што му ги упатуваат навивачите на Реал.
„Би сакал да им се извинам на г-дин Флорентино и г-дин Винисиус за она што се случи. Очигледно не беше во ред од мене да се доведам во таква ситуација и прифаќам дека погрешив“, рече аргентинскиот тренер на прес-конференцијата по утринскиот тренинг.
Симеоне додаде и дека Барселона заслужува да го освои Суперкупот.
„Барселона е тим со одлични играчи, одличен тренер со многу јасни идеи и тим кој следи јасно дефинирана филозофија на игра. Резултатите и трофеите што ги освојуваат го потврдуваат тоа“, рече Симеоне.
