Во Реал Мадрид фрлаат дрвја и камења кон словенечкиот судија Славко Винчиќ затоа што го исклучи Едуард Камавинга, но поранешниот фудбалер на кралскиот клуб, Весли Снајдер, верува дека главниот виновник е францускиот репрезентативец. Судијата му покажа втор жолт, односно црвен картон во 86. минута.
До моментот на исклучувањето Реал водеше со 3:2, резулотат кој мечот го носеше во продолженија. Иако шпанскиот тим остана со играч помалку доцна во натпреварот, Баерн сепак успеа не само да израмни туку и да постигне и втор гол за пресврт и победа.
Поранешниот холандски ас и играч на Реал Мадрид, Весли Снајдер, вели дека не е виновен судијата, туку прстот го впери во францускиот играч.
„Глупав идиот! Го правиш ова откако веќе си добил жолт картон. На ова ниво, тоа е едноставно глупаво. Знаеш ли што треба да прават играчите на Реал Мадрид по натпреварот? Треба да го истурат целиот свој гнев врз него во соблекувалната и да не ги обвинуваат судиите“, изјави Снајдер за холандскиот медиум Ziggo Sport.
Баерн го победи Реал Мадрид со вкупен резултат од 6:4 (2:1, 4:3) и се пласираше во полуфиналето на Лигата на шампионите, каде што ќе се соочи со европскиот шампион Пари Сен-Жермен.
Втората полуфинална двојка ја сочинуваат Атлетико - Арсенал. Полуфиналните натпревари се закажани за 28/29 април и 5/6 мај.
