Стефан Ристовски (33), македонска легенда на ХНЛ, ја напушти Хрватска откако му истече договорот со загрепски Динамо. Нов клуб на десниот бек е Сарајево, потврди Index. Ристовски таму го привлекол тренерот Зоран Зекиќ, кој го освои Купот на БиХ со клубот од Кошево минатата сезона, а заврши трет во првенството.
Ристовски ќе му се придружи на својот нов клуб на подготовките во Словенија, а го очекува и европски предизвик. За две недели се игра првиот натпревар од второто квалификациско коло од Конференциската лига против романската Универзитатеа. Покрај Зекиќ, во Сарајево го чека и Иван Баниќ, уште едно познато лице од Хрватска. Голманот неодамна дојде од Горица.
Во Сарајево од пред неколку дена е и Крсте Велкоски, поранешен соиграч на Ристовски од репрезентацијата на Македонија, кој по завршувањето на сезоната замина во пензија. Во босанскиот клуб ќе ја извршува функцијата спортски директор.
Ристовски го напушти Динамо по 4 и пол години. За време на неговиот престој на „Максимир“ освои 4 шампионски титули и 2 купа. Одигра 185 натпревари постигнувајќи 7 голови и направи 21 асистенција. Беше омилен кај навивачите поради својата посветеност и се истакна како кокапитен.
Претходно ја освои двојната круна со Ријека во сезоната 2016/2017 година. Исто така беше омилеб во Рујевица поради гореспоменатиот квалитет, а за Ријека постигна 2 гола и имаше 16 асистенции во 86 натпревари. Одигра вкупно 188 натпревари во ХНЛ.
Ја напушти Ријека во јануари 2018 година за лисабонски Спортинг за 1,1 милион евра отштета. Динамо го донесе три години подоцна за 1 милион евра. Transfermarkt сега ја проценува неговата вредност на 750 илјади евра. Искусниот Ристовски одигра 81 натпревар за Македонија и постигна 2 гола, но се повлече летото 2023 година наведувајќи дека не сака да игра додека селектор е Благоја Милевски.
Сарајево е најтрофеен клуб од Босна и Херцеговина. Двапати ја има освоено лигата на поранешна Југославија и 5 пати босанската лига, а има 8 пехари од босанскиот Куп.
