Улична банда со бекатон претепа до смрт фудбалер во Уганда

Фудбалот во Уганда е завиен во црно, откако капитенот на Вила и поранешен младински репрезентативец на својата земја, Дејвид Оуори, почина како резултат на брутален напад во Кампала. Имаше само 27 години.

Според полицијата, Оуори бил нападнат во близина на својот дом кога им се спротивставил на крадците кои се обиделе да му го украдат мобилниот телефон и други лични работи.

Сведоци тврдат дека група напаѓачи го претепале со бекатон, по што избегале, оставајќи го во несвест.

Фудбалерот бил итно префрлен во болница, каде им подлегнал на сериозните повреди. Вила се збогува со својот капитен со емотивна порака.

„Изгубивме многу повеќе од играч. Изгубивме лидер, брат и пријател“, објави клубот.

Во 2023 година, Дејвид Оуори се врати во Вила по двегодишен престој во Европа (играше за Велес во Шпанија и Утсиктенс во Шведска) и го предводеше клубот до нивната прва титула во лигата по 20 години. Беше поранешен младински репрезентативец на Уганда, но никогаш не дебитираше за сениорскиот тим, иако беше повикуван.

Полицијата започна истрага и интензивно ги бара напаѓачите, додека неговото убиство предизвика јавно негодување и обновени повици до властите да ја засилат борбата против насилниот криминал во главниот град на Уганда.