Узбекистан подготвен за Мундијалот: Канаваро официјално нов селектор

Она што се најавуваше со недели, денес го достигна својот конечен епилог - Фабио Канаваро официјално го презеде кормилото на репрезентацијата на Узбекистан, а со овој избор ќе се обиде да направи изненадување на претстојното Светско првенство во јуни и јули 2026 година.

Ова ќе биде втор селекторски ангажман во кариерата на легендарниот италијански фудбалер и светски шампион, кој досега имаше разни ангажмани во Кина, Саудиска Арабија, Европа... Последниот клуб што го водеше беше загрепски Динамо, каде што остана помалку од четири месеци. 

Неговиот мандат во Загреб заврши на почетокот на април, а сега одлучи да се врати во фудбалот. Тимур Кападзе, кој успешно ги заврши квалификациите откако го наследи словенечкиот стручњак Сречко Катанец, го предаде кормилото на Узбекистан, откако федерацијата на оваа централноазиска земја одлучи да доведе големо име на чело на тимот.

Да потсетиме дека Узбекистан го постигна својот прв историски пласман откако го освои второто место во Групата А од третата фаза од азиските квалификации, завршувајќи веднаш зад Иран, а пред екипи како ОАЕ, Катар, Киргистан и Северна Кореја.