В недела се игра 101-то скопско дерби помеѓу старите ривали Работнички и Вардар.
Кога станува збор за градските дербија, особено оние каде два клуба дела ист стадион, она што за Италијанците се дуелите Интер - Милан, Рома - Лацио и Сампдорија - Џеноа, тоа за скопјани е натпреварот помеѓу Вардар и Работнички.
Ова ривалство датира уште од почетоците на повоената југословенска лига кога во 1951 година прв пат Работнички и Вардар ги крстиле копјата. Пред полни трибини на тоа старо претземјотресно Скопје победиле „Романтичарите“ со 2:1, а натпреварот бил инспирација за писателот Васил Иљоски да ја напише драмата „2 спрема 1“. Кое друго дерби може да се пофали со ваква историја?
Денес, 75 години подоцна, старите ривали по 101-ви пат ќе ги одмерат силите. Вардар важи за голем фаворит. Лидер е на табелата и ита кон титулата, додека Работнички е закован во зоната за испаѓање и му гори под нозе бидејќи мора да освојува бодови, а тоа никако не успева да го прави.
Скопското дерби е одлична причина да дојдете на стадион, да го поддржите домашниот фудбал и да присуствувате на еден настан со долга историја и традиција. Неделниот термин од 13 часот е одличен за гледање фудбал на стадион, кој потоа можете да го искомбинирате со ручек во некоја од локалните кафеани.
Во досегашните 100 одиграни дерби натпревари поуспешен е Вардар со 41 победа, Работнички има 34, а 25 натпревари завршиле без победник. Ова се сите официјални натпревари без разлика дали биле во македонската прва лига, југословенските прва и втора лига или куп натпреварувањата.
Одиграни натпревари: 100 (89 првенствени, 10 куп, 1 суперкуп)
Победи на Работнички: 34
Победи на Вардар: 41
Нерешени: 25
Гол-разлика: 130:111 во корист на Вардар
Натпреварот ќе се игра в недела (15 февруари) од 13:00 часот на Националната арена „Тодор Проески“, но се очекува потврда од ФФМ бидејќи можно е да дојде до промена на локацијата доколку теренот на Арената треба да се чува за натпреварот на Шкендија в четврток во Конференциската лига.
Табела:
