За прв пат во историјата жена стана тренер на тим од Големата петорка

За прв пат во историјата жена стана тренер на тим од Големата петорка, а револуционерна промена се случи во германскиот бундеслигашки клуб Унион Берлин.

По вчерашниот пораз од 3:1 против Хајденхајм, челниците на Унион Берлин го отпуштија тренерот Штефен Баумгарт и го заменија со 34-годишната Мари-Луиз Ета (моминско Багехорн).

Ета, која претходно го водеше тимот до 19 години на Унион Берлин, а требаше да го преземе женскиот тим во текот на летото, сега има задача да го спаси клубот од испаѓање од Бундеслигата.

„Воодушевена сум што клубот ми ја даде довербата за оваа тешка задача. Силата на Унион отсекогаш била и останува дека во вакви ситуации сите ние ги здружуваме силите. Секако, сигурна сум дека ќе ги добиеме бодовите што ќе нè спасат“, рече Ета по преземањето на функцијата.

Унион Берлин моментално е на средината на табелата на 11-тото место, но само 7 бодови пред Занкт Паули, кој е на 16-тото место кое води во баражот за испаѓање од Бундеслигата.