Земја на раб на војна дава милион долари на секој фудбалер ако се пласира во мундијалскиот бараж

Репрезентацијата на Демократска Република Конго игра клучни натпревари во африканските квалификации за Светското првенство 2026, а земјата одлучи дополнително да ги мотивира своите фудбалери.

Според Sport News Africa, претседателот Феликс Чисекеди одобрил бонус до еден милион долари за секој играч доколку популарните „Леопарди“ се квалификуваат во интерконтиненталниот бараж за Светското првенство.

За разлика од повеќето африкански репрезентации кои играат пријателски натпревари за време на ноемврискиот прозорец, ДР Конго влегува во решавачката фаза од квалификациите.

Избраниците на Себастјан Дезабре в четврток ќе се соочат со Камерун на неутрален терен во Рабат, Мароко, а доколку победат во финалниот бараж ќе се соочат со победникот од дуелот Нигерија - Габон. Финалето ќе се игра на 16 ноември, недела, исто така во Рабат. Овие четири репрезентации беа најдобри второпласирани во групите.

Овој мини турнир одлучува кој ќе ја претставува Африка во интерконтиненталниот бараж во март. Таму 6 репрезентации ќе се борат за две места на Светското првенство 2026, кое ќе се одржи во САД, Канада и Мексико. Потврдени учесници досега се Нова Каледонија (Океанија) и Боливија (Јужна Америка), а место покрај Африка има и за Азија (ОАЕ или Ирак) и две за Северна Америка.

Владата на Конго сака да ги мотивира играчите колку што е можно повеќе, а според истиот извор, националната банка веќе добила инструкции да врши директни исплати на играчите во случај на пласман.

Интересно е што селекторот Дезабре и тренерскиот персонал не се вклучени во оваа награда, која е наменета исклучиво за играчите.

Овој потег на владата покажува колку големо значење придава државата на успехот на националниот тим, а овие потези доаѓаат во екот на затегнатите односи меѓу Конго и Руанда, практично во воена состојба.