Зошто интернетот одеднаш го хејта Меси?

По кревањето на трофејот од Светското првенство во декември 2022 година, Лионел Меси беше славен низ целиот свет. Денес, речиси четири години подоцна, наративот на социјалните медиуми драстично се промени и еден од најголемите фудбалери на сите времиња се повеќе се прикажува како негативец. Марио Науфал, новинар со 3,7 милиони следбеници на X, објасни од каде доаѓа таквата драстична промена.

Промената не се случи на фудбалскиот терен. Кариерата и 20-годишниот опус на Меси се достапни преку безброј видеа, но проблемот не е во фактите, туку во нивната презентација. Алгоритмот на социјалните медиуми одигра клучна улога. Содржината што го прикажува Меси во негативно светло стана попопуларна од онаа што го слави, а алгоритмите почнаа да ја пласираат таквата содржина до поголем број корисници.

Овој феномен не е нов. Студија од 2018 година на MIT анализираше 126.000 тврдења на платформата X и откри дека лажните приказни се шират шест пати побрзо од вистинските. Покрај тоа, корисниците имале 70% поголема веројатност да споделат лажни информации. Причината е едноставна: содржината што предизвикува гнев и силни негативни реакции привлекува значително повеќе внимание отколку точните и проверени информации.

Не е нужно потребна голема лага за да се создаде негативен наратив. Сè што е потребно е т.н. ефект на илузорна вистина, психолошки феномен што нè прави поверојатно да веруваме во тврдењето дека е вистина кога сме постојано изложени на него. Ова чувство на вистина може да опстојува дури и ако сме свесни дека информацијата е лажна или откако е официјално демантирана.

Парадоксот е што ова се случува во фудбалот, една од најдобро документираните области на човековата активност каде што речиси секој момент е снимен од повеќе агли. И покрај достапноста на докази, наметнатиот наратив преовладуваше над фактите.

Случајот со Лионел Меси поставува сериозно прашање: ако алгоритмите можат толку лесно да го обликуваат јавното мислење за еден од најпознатите спортисти во светот, чија кариера е транспарентна, колку влијание имаат тие врз перцепцијата на луѓето и настаните за кои нема обемна видео архива?