Евролигата сака да ја тужи НБА

Челниците на Евролигата ѝ се заканија на НБА со тужба поради проектот на американската лига во Европа, објавува Eurohoops.

Евролигата официјално ја информирала НБА дека би можела да покрене судска постапка доколку има дискусија за нов проект во Европа со претставници на клубовите кои веќе се обврзале на Евролигата за следните десет години.

Според извори на Eurohoops, Евролигата испратила писмо до НБА минатата недела, а сите клубови од Евролигата кои моментално имаат А лиценца се известени.

Овој потег уште еднаш потврдува дека Евролигата и НБА се во битка за европскиот пазар, времето ќе покаже дали ќе се случи нешто драматично во наредните месеци.

Одржан е состанок на акционерите на Евролигата, каде што на Реал Мадрид, Барселона и Асвел им беше наредено да донесат одлука за својата иднина, а се верува дека Фенербахче е исто така во таа група тимови кои не потпишале нови лиценци.

Рокот што го поставија акционерите на Евролигата за целосна посветеност на натпреварувањето истекува во петок, па одговорите би можеле да дојдат во следните денови.

Сепак, треба да се напомене дека, законски, според важечките договори, клубовите можат да потпишуваат нови лиценци до 30 јуни 2026 година.

Се верува дека Фенербахче ќе потпише порано или подоцна, Реал Мадрид останува енигма, додека деновите на Асвел во Евролигата се избројани.

Барселона веднаш го кажа својот став, дека е подготвена да потпише нов 10-годишен договор со Евролигата.