Јамајка создава моќна кошаркарска репрезентација

Кошаркарската асоцијација на Јамајка (ЈБА), преговара со неколку имиња од НБА за во иднина да го носат дресот на оваа држава.

Некои играчи веќе се согласиле да го носат дресот на селекцијата на оваа карипска земја, тврди новинарот на „Јамајка Обзервер“, Даниел Блејк. Близнаците Амен (Хјустон Рокитс) и Асар Томпсон (Детроит Пистонс) чиј татко има јамајкански корени, влегле во процес на добивање пасош од оваа земја.

Покрај нив, Јамајка може да смета на Џордан Пауел (поранешен играч во НЦАА) и Џош Минот од Минесота Тимбервулвс, кои веќе имаат право да играат за репрезентацијата на земјата.

И тоа не е сè, бидејќи ЈБА е во напредни преговори со некои од брилијантните имиња од најсилната лига: Скоти Барнс од Торонто Репторс, Ајзеа Стјуарт од Детроит Пистонс и Девин Васел од Сан Антонио Спарс.

Сите тројца, благодарение на еден од нивните родители, го исполнуваат условот за аплицирање за јамајкански пасош.

Целта на Јамајканците е да се квалификуваат за Светското првенство во 2027 година, а тоа би било нивно прво учество на најголемото светско натпреварување во историјата.

Досега никогаш не играле на Олимписките игри, а само еднаш учествувале во натпреварувањето на ФИБА Америка купот, во 2013 година.

Доколку сите споменати играчи му бидат на располагање на селекторот, Јамајка сигурно би била меѓу фаворитите во квалификациите за Мундобаскетот. Јамајканците ја „пресликаа“ политиката на Кошаркарската асоцијација на Бахамите, кои не толку одамна ангажираа тројца НБА играчи: Бади Хилд, Ерик Гордон и Деандре Ејтон.

Таа селекција беше на прагот на сензација против Шпанија, кога дожиева пораз во продолженија во баражот за пласман на Олимписките игри.