Четири клуба го контактирале Рич Пол, агентот на Леброн Џејмс (40), со цел да ја испитаат можноста тој да ги напушти Лос Анџелес Лејкерс и евентуално да потпише за нив.
Ова го објави Дејв Мекменамин од ESPN, кој не прецизираше за кои клубови станува збор. Агентот Пол рече дека Џејмс не побарал да ги напушти Лејкерс, ниту пак разговарал за такво сценарио со него.
Шпекулациите за иднината на Леброн се појавија откако Пол објави дека Џејмс ќе ја искористи својата опција за договор од 52,6 милиони долари за сезоната 2025/26. Потоа Пол изјави дека приоритет на Леброн е борбата за шампионска титула и донесувањето одлуки што се најдобри за неговата кариера, што го отвори прашањето дали ќе остане со Лејкерс и по следната сезона.
Инсајдерите на ESPN, Рамона Шелбурн и Брајан Виндхорст, објавија во петокот дека по објавата, неколку клубови размислувале да дадат понуда за Џејмс, вклучувајќи ги и Голден Стејт Вориорс. Мекменамин потврди со својот извештај дека четири клуба навистина покажале конкретен интерес.
Важно е да се нагласи дека Леброн има клаузула за забрана за размена во договорот, што значи дека никаков трансфер не може да се реализира без негова лична согласност. Тој се појави на натпреварот на Лејкерс од Летната лига во саботата за да го гледа својот син, Брони. Беше опкружен со камери и новинари и му беше понудено да коментира за ситуацијата и „да каже што сака“. „Немам што да кажам“, одговори тој.
„Леброн засега останува со Лејкерс и не бара да си замине. Но, ако односите во клубот се влошат или се предомисли, неколку тимови се подготвени да се борат за најдобриот стрелец во историјата на НБА“, наведува американското спортско списание Sports Illustrated.
Леброн Џејмс беше еден од најдобрите играчи во лигата минатата сезона, и покрај своите години, со просек од 24,4 поени, 8,2 асистенции и 7,8 скока со 51,3% шут од поле и 37,6% од шут за три поени. Со доаѓањето на Лука Дончиќ во клубот, тој почна да паѓа во втор план.
