Ноќеска беа одиграни два натпревара од плејофот на НБА, а по нив добивме уште еден четвртфиналист во тимот на Кливленд Кавалирс, кој го сомле Мајами Хит во серијата со убедливи 4-0.
Кливленд и во последниот дуел го презгази својот ривал победувајќи со резултат од 138:83, разлика од неверојатни 55 поени. Инаку, Кливленд беше доминантен во секој меч. Серијата започна со триумф од 21 поен, во вториот дуел беше „само“ 9 разлика, во третиот 37, а ноќеска испишаа историја со четвртиот натпревар.
Вкупната разлика во низ серијата гласи 122 поена, што ја прави најубедлива серија во историјата на НБА плејофот. Претходниот рекорд го држеше Лос Анџелес Лејкерс од 1986 година, кога ја заврши серијата со +109 поени разлика во четири натпревари.
Кај Кливленд се истакнаа Донован Мичел со 22 поена, Де'Андре Хантер со 19, Тај Џером уфрли 18, Еван Мобли 17, а Џерет Ален дабл-дабл со 14 поени и 12 скокови. Во поразениот табор Никола Јовиќ го одигра својот натпревар на сезоната во дресот на Мајами постигнувајќи 24 поени, додека Бем Адебајо оствари дабл-дабл со 13 поени и 12 скокови.
Натпреварот помеѓу Голден Стејт Вориорс и Хјустон Рокетс беше далеку повозбудлив, а домаќините славеа по драматичната победа од 109:106, поведувајќи со 3-1 во серијата.
Гостите дури и водеа на полувремето, но брилијантниот трет период на Голден Стејт беше одлучувачки фактор, во кој успеаја да направат пресврт и да ја одржат таа предност до крајот.
Џими Батлер со 27 и Брендин Паџемски со 26 поени беа најдобри во редовите на Голден Стејт, додека на Хјустон не му помогна ниту одличната игра на Алперен Шенѓун, кој имаше 31 поен и 10 скокови, а го пратеше Фред ВанВлит со 25 поени.
Резултати:
Мајами Хит - Кливленд Кавалирс 83:138 (0-4 во партии)
Голден Стејт Вориорс - Хјустон Рокитс 109:106 (3-1 во партии)
