Во натпреварот на отворањето на сезоната, бранителот на титулата Оклахома и Хјустон се соочија еден против друг, а резултатот беше решен по две продолженија, 125:124.
Брилијантниот Шеј Гилџс-Александер беше херој на Оклахома Сити Тандер, постигнувајќи ги поените во последните секунди за да го запечати првото продолжение, а потоа и победата.
Шеј го заврши натпреварот со 35 поени, 5 скокови и 5 асистенции, а имаше одлична помош од Чет Холмгрен кој додаде 28 поени и 7 скокови.
На другата страна, Алперен Шенѓун имаше учинок од 39 поени, 11 скокови и 7 асистенции, додека Кевин Дурент постигна 23 поени и 9 скокови.
Лејкерс без Леброн Џејмс, кој за прв пат во својата кариера не играше на првиот натпревар од сезоната, не можеа да го совладаат Голден Стејт, па Вориорс славеа со 119:109 благодарение на Џими Батлер кој го заврши натпреварот со 31 поен, додека Стеф Кари додаде 23 поени.
На Лејкерс не им помогна ниту маестралната изведба на Лука Дончиќ, кој беше на работ на трипл-дабл.
Дончиќ го заврши натпреварот со 43 поени, 12 скокови и 9 асистенции, но негов единствен расположен соиграч беше Остин Ривс со 26 поени и 9 асистенции.
Дончиќ беше импресивен, бидејќи стана првиот играч на Лејкерс по Коби Брајант во 2007 година кој ја отворил сезоната со 40 или повеќе поени.
Брајант постигна 45 поени на отворањето на сезоната против Хјустон.
Резултати:
Лос Анџелес Лејкерс - Голден Стејт Вориорс 109:119
Оклахома Сити Тандер - Хјустон Рокетс 125:124 (две прод.)
