Прва олимписка тепачка по 1998: Се пресметаа Французин и Канаѓанец

На Зимските олимписки игри немало тепачка од 1998 година, а синоќа конечно и тоа се случи и, нормално, на хокеј меч. Се степаа Французинот Пјер Кринон и Канаѓанецот Том Вилсон, и тоа при убедливо водство на Канада од 10:2.

Францускиот хокеар прво со лакт го удри Нејтан МекКинон, што го налути Вилсон. Кога Кринон се врати на теренот по казната од 2 минути, асот на Вашингтон Капиталс во 12-тата минута возврати со удирање со лакт на Французинот на ист начин, принудувајќи го да се залепи за заштитната ограда, по што избувна тепачка.

Вилсон и Кринон беа толку подивени што судиите едвај успеаја да ги одвојат, да ги смират и потоа да ги испратат во делот за одлежување казна.

Кринон е познат во Франција како Бандитот, бидејќи поради суспензии веќе пропушти 19 натпревари од француското првенство за Гренобл во последните четири години. Најновиот беше во ноември минатата година кога го нокаутира голманот на Анже, Мет О'Конор, предизвикувајќи му повреда на окото и добивајќи суспензија од 7 натпревари. Случајот отиде и на суд.

Судиите на турнирот едвај ги одвоија Вилсон и Кринон, кои добија црвени картони и нема да има понатамошни дисциплински мерки од Олимпискиот комитет, но Французинот ќе се соочи со казна кога ќе се врати дома. Имено, Француската федерација бара од Кринон да ја разјасни ситуацијата со техничкиот директор пред да одлучи да покрене постапка.

Тепачките се дел од хокејскиот фолклор, особено во НХЛ каде што Вилсон е навикнат да ја вади кацигата и да се тепа со своите ривали со тупаници...

Канада се квалификуваше директно во четвртфиналето, додека Франција заврши последна во групата без освоен бод и ќе игра против Германија во осминафиналето. Другите двојки од 16-те средби што ќе се играат на 17 февруари се: Швајцарија - Италија, Чешка - Данска и Шведска - Латвија. Покрај Канаѓаните, во четвртфиналето се и САД, Словачка и Финска.