Рускиот министер за спорт и претседател на Рускиот олимписки комитет, Михаил Дегтјарев, изјави дека Русија е подготвена да организира трети Олимписки игри. Во интервју за ТАСС најави дека Москва повторно ќе поднесе кандидатури за организација на летните и зимските Олимписки игри.
Тој нагласи дека Русија веќе двапати покажала дека може да организира натпреварувања „на највисоко ниво“. Според него, земјата наскоро ќе ги обнови односите со Меѓународниот олимписки комитет (ИОК), потенцирајќи го руското гостопримство и развиената инфраструктура.
„Луѓето сѐ уште се сеќаваат на Светското првенство во фудбал во Русија. Се сеќаваат колку Русија беше гостопримлива, како луѓето се забавуваа и навиваа во Москва, Екатеринбург, Казан, Волгоград, Калининград и други градови“, рече Дегтјарев.
Според него, олимпиското движење треба да ги обединува луѓето и не треба да постојат никакви бојкоти.
„Во 1980 година нам ни објавија бојкот, а подоцна и ние бојкотиравме. Сето тоа беше погрешно, исто како што е погрешна и денешната дискриминација врз нашите спортисти врз основа на националност. Тоа треба да престане“, додаде тој.
Претходно беше објавено дека руските гимнастичари и судии се враќаат на меѓународните натпреварувања, но ќе настапуваат под неутрален статус.
Руските спортисти во моментов немаат право да настапуваат на Олимписките игри под името, знамето или химната на Русија поради санкциите воведени по инвазијата врз Украина. Сепак, во ограничен број и под строги услови, одредени руски спортисти може да се натпреваруваат како Индивидуални неутрални спортисти, како што беше случајот на Игрите во Париз минатата година.
За да добијат дозвола за учество, не смеат да имаат никаква поврзаност со руската војска или безбедносните служби, не смеат јавно да ја поддржуваат руската агресија врз Украина и мора да поминат процес на проверка од страна на ИОК.
Олимписките игри во Русија досега се одржале двапати: летните во Москва во 1980 година и зимските во Сочи во 2014 година.
