Ракометната репрезентација на Македонија вечерва во Хернинг го игра клучниот натпревар во првата фаза на 17-тото Европско првенство. Од 18 часот, Македонија ќе се соочи со репрезентацијата на Романија.
Македонија по нерешениот резултат со Португалија (29:29) ги задржа шансите за пласман во главната фаза. Вечерва ќе биде познато дали избраниците на Кирил Лазаров ќе продолжат во главната фаза, во група со Франција, Норвешка, Германија, Шпанија и Данска.
Познато е што ѝ е потребно на Македонија за пласман во топ 12. Прв услов е победа над Романија, по можност убедлива, а потоа потребен е и убедлив триумф на Данска над Португалија.
По првите две рунди во Б групата, Португалија има гол разлика +6, а Македонија -12.
Данците нема да калкулираат со Португалците, ќе одат на победа бидејќи само така во наредната фаза ќе пренесат 2 бода, што е клучно во борбата за место во полуфиналето. Меѓутоа, ним им одговара било каква победа, дури и минимална.
