Сопственикот на Алкалоид, Живко Мукаетов, се огласи по повод вчерашното неодиграно финале на Европската лига меѓу неговиот клуб и атински АЕК.
Грчкиот клуб не излезе на паркетот во салата „Борис Трајковски“ откако претседателот им забрани на ракометарите да играат, иако тие сакаа да се надигруваат. Во заткулисни игри Грците се обидуваат да добијат службена победа знаејќи дека по поразот со 4 голови разлика среде Атина шансите за ремунтада во македонската престолнина им се никакви.
ЕХФ дополнително фрли масло на оганот објавувајќи дека натпреварот не се одиграл од само ним познати „безбедносни причини“.
„Oгромно БЛАГОДАРАМ од срце на сите кои дојдовте во СЦ 'Борис Трајковски' да го бодрите РК Алкалоид кон историскиот успех. Чесно, праведно, спортски и витешки пристапивме кон ова натпреварување, целосно. И клубот и прекрасната публика синоќа. РК Алкалоид ги исполни сите барања на надлежните авторитети во поглед на сите организациски аспекти од синоќешниот настан, кој требаше да биде заокружување на една убава приказна во која е вложен многу труд, напор и ресурси. Се надеваме на одлука според важечките спортски правилници на ЕХФ“, напиша Мукаетров на Instagram.
