Суперлигашот Пролет објави дека Никола Матлиески повеќе не е шеф на стручниот штаб на клуб од истоименото скопско маало.
Матлиески пристигна во клубот на почетокот од 2025 година, во исклучително тежок момент по трагичната смрт на Александар Јовиќ.
„Максимално одговорно и професионално ја извршуваше тренерската улога. За жал, резултатите во досегашниот дел од сезоната не се посакуваното ниво, а по последниот пораз од Прилеп на домашен терен беше донесена одлука за промена на тренерската позиција“, соопшти клубот.
Пролет добро ја почна сезоната, остварувајќи 4 победи и реми во првите 10 кола, во кои очекувано загуби од Еурофарм Пелистер, Алкалоид, Вардар и Еурофарм Пелистер 2, но и од Прилеп. Потоа следуваше серија порази и само една победа над последнопласираниот Радовиш.
Од Пролет известија дека Игор Илиевски, кој е дел од тренерскиот тим во младинската школа на клубот, ќе биде привремено решение до крајот на годината.
„РК Тинекс Пролет му се заблагодарува на Никола Матлиески за сѐ што стори за овој клуб.“
Пролет моментално е на 9-тото место со 11 бодови, четири помалку од последното место кои води во плејофот.
