Македонија ја совлада репрезентацијата на Романија во последниот натпревар од групната фаза, но не со посакуваната разлика. Сепак, крајниот пласман ќе го одлучи вечерашниот дуел на Данска и Португалија.
Македонија водеше во текот на целиот натпревар, а разликата варираше од +2 до +5. На полувреме се замина со водство од четиро разлика, односно 13:9. Во вториот дел прво разликата се одржуваше, за потоа постепено да почне да се намалува и во 56. минута Романците прв пат да израмнат (22:22). Потоа дури имаа и напад за водство во 57. минута, но напаѓајќи Штефан Компаничи со лакт го удри в лице Павле Атанасијевиќ и доби црвен картон.
На почетокот од последната минута Кузмановски реализираше пенал за 23:22. Романците имаа напад со играч помалку, се одлучија да играат без голман, постигнаа гол за 23:23, но Македонците веднаш отидоа во напад и на секунда пред крајот Ненад Костески постигна гол за победа (24:23).
Филип Кузмановски со 9 голови беше најефикасен на натпреварот, а 8 постигна Јонуц Нистор. Мартин Томовски имаше 5 одбрани, Никола Митревски 2, а со 10-те одбрани Михаи Попеску беше прогласен за играч на натпреварот.
Со обезбедувањето на третото место во групата Македонија избори мундијалски бараж од второто коло, додека Романија како последнопласирана ќе игра од првото коло.
Од 20:30 часот домаќинот Данска против Португалија ќе го комплетира последното коло во групната фаза од нашата група. За пласман во наредната фаза Македонија ќе се надева дека Данците ќе победат со дури 18 голови разлика.
