Во привремената КОВИД болница во Белградската арена се сместени првите пациенти, изјави српскиот министер за здравство Златибор Лончар по состанокот со директорите на КОВИД болниците.
Се зголемува бројот на лица заразени со коронавирус, но исто така и бројот на пациенти во болница, изјави денеска министерот Лончар, објави b92.net.
Пополнетоста на капацитетот на КОВИД болниците надмина 60%, затоа ја отворивме Арена, рече Лончар и додаде дека пациентите со полесна клиничка слика од болниците „Драгиша Мишовиќ“, КБЦ Карабурма, Бежанијска коса и Клиниката за инфективни болести ќе бидат префрлени во Арена.
Тој потсетува дека неопходните гасови се распределени во Арена и дека „во краен случај и најтешките пациенти ќе можат да се лекуваат таму“.
Лончар апелираше до сите граѓани да се пријават во КОВИД амбулантите навремено веднаш штом ќе се појават првите симптоми. Како што рече, се подготвуваат и КОВИД болници во Батајница и Крушевац, со по 1.000 места, во кои ќе работат над 1.000 здравствени и немедицински работници.
„Се подготвуваме за најлошото сценарио, следиме што се случува во регионот и Европа, мислам дека се опуштивме повеќе отколку што требаше. Србија сепак има добар резултат, но сè може да се промени ако не се почитуваат мерките. Апелирам до сите граѓани, да не си играме ‘мачката и глувците’ со мерките затоа што мора да размислуваме и за пациенти кои страдаат од други болести“, рече Лончар.
Тој изјави дека секоја индивидуа треба да се грижи за тоа што е најдобро за своето здравје и како да се заштити од коронавирусот.
На прашањето дали се размислува за воведување нови мерки, тој рече дека потребна е рамнотежа помеѓу мерките и функционирањето на државата.
„Ако сакате да обезбедите лекови, плати за вработените, нови болници, тоа не може да се постигне ако затворите сè. Не се мерките тие што ќе ја победат короната, тоа е нашата свест“, изјави министерот.
Тој потенцираше дека мерките нема да помогнат доколку граѓаните не разберат дека е важно да се придржуваат до нив, бидејќи така се штитиме себеси, но и другите.
„Не е реално дека сме толку неодговорни што некој треба да нѐ заклучи дома за да сфатиме што треба да сториме. Тоа беше потребно во време кога не знаевме доволно за самиот вирус“, заклучи тој.
Во наредниот ден или два, дополнителни количини на 50.000 дози увезена вакцина против сезонски грип ќе пристигнат во здравствените центри во Србија, вели министерот за здравство.
По состанокот со директорите на КОВИД болниците, тој пред новинарите изјави дека вакцините на „Торлак“ против сезонски грип во моментов се достапни во здравствените центри и дека се апсолутно безбедни. Тие можат да ги примаат граѓани на возраст од 18 до 65 години.
„Нашите камиони денеска одат по дополнителни количини, тоа се дополнителни 50.000 дози што треба да пристигнат во наредниот ден или два. После тоа, дополнителни количини ќе пристигнуваат на секои неколку дена“, рече Лончар.
Тој ги советува граѓаните кои сакаат да се заштитат од грип да се запишат во надлежниот здравствен дом да сакаат да се вакцинираат и ќе бидат повикани штом пристигне вакцината.