Под слоганот „Враќање во кино“ од 1 јули во Србија повторно ќе заживее гледањето филмови на големо платно.
Киносалите во Србија ќе отворат по повеќе од три месеци пауза поради кризата предизвикана од коронавирусот.
Од 1 до 15 јули граѓаните на Србија ќе може да гледаат филмови што се дел од акцијата за враќање во киносалите што е поддржана од Филмскиот центар на Србија и српската Стопанска комора.
Во духот на солидарноста и со желба да се врати овој тип на социјален живот во земјата, цената на влезниците во сите кина низ Србија ќе биде симболични 200 динари.
Репертоарот во сите кина ќе биде ист, составен од 20-тина филмови од оваа и минатата година кои се издвоиле со гледаност и квалитет, како „Joker“ и „Once Upon a Time in Hollywood“, како и филмови чии прикажувања беа прекинати со доаѓањето на пандемијата.
По завршувањето на акцијата, од 15 јули на репертоарите на српските кина ќе се најдат и првите премиери.
Во Србија заклучно со последните бројки се регистрирани 11.667 случаи на COVID-19, од кои 6.931 се оздравени, а 247 починаа.
Во изминатите 24 часа беа регистрирани 96 нови случаи и првиот смртен случај по два дена без починати пациенти од коронавирусот.