Ставајте појас во кола, токму тоа му го спаси животот на Тајгер Вудс во сообраќајката

Полицијата на Лос Анџелес соопшти дека славниот голфер носел безбедносен појас за време на несреќата, како и дека воздушните перничиња се отвориле како што е предвидено.

Најдобриот голфер на сите времиња, Тајгер Вудс, доживеа тешка сообраќајна несреќа завчера, кога неговото возило се преврте во близина на Лос Анџелес.

Според последните информации, тој е вон животна опасност, а во несреќата се здобил со тешки повреди на десната нога.

Снимката објавена од американските медиуми покажува дека корејскиот теренец Genesis GV80, во кој бил Вудс, бил многу оштетен, особено неговиот преден дел, но структурата на патничката кабина е скоро целосно зачувана.

Полицијата во Лос Анџелес го посочи и овој факт, наведувајќи го како една од причините зошто славниот голфер не е сериозно повреден.

Како што велат, важно е и тоа што Вудс носел безбедносен појас за време на несреќата, така што воздушните перничиња се отвориле и спречиле посериозни повреди, можеби дури и смрт.

„Несреќата се случи на стрмен и дел од патот со остра кривина, каде луѓето често губат контрола над возилото поради прекумерна брзина. Веруваме дека брзината беше главната причина. Немаше индиции дека возачот бил под влијание на нешто“, рече Алехандро Вилјануева од канцеларијата на шерифот на Лос Анџелес.

„Утврдивме дека возилото најверојатно најпрво удрило во работ на тротоарот, преминало две ленти, удрило во вториот раб, па во дрво, се превртело неколку пати и запрело на стотина метри од патот. Немаше знаци на лизгање или кочење, а времето беше добро. Искрено, не знаеме како преживеа г-дин Вудс, но имаше многу среќа. Сигурно му помогнаа појасот што го носеше и бројните воздушни перничиња што се отворија навреме“.

По оваа несреќа, во фокусот на јавниот интерес беше дотогаш малку познатиот корејски производител на премиум автомобили Genesis, кој е во сопственост на концернот Hyundai.

Genesis како самостоен бренд во Hyundai постои само неколку години и полека се пробива до клиентите во жестока конкуренција од германските производители Mercedes, BMW и Audi, но и брендови како јапонскиот Lexus, кој е многу успешен на американскиот пазар .

Genesis GV80 е првиот SUV од овој бренд, а на пазарот се појави минатата година.