Вардар в сабота го пречекува тимот на Мотор, а капитенот Стојанче Стоилов не е оптимнист особено по заминувањето на Криштопанс и Атман.
По Павел Атман кој се пресели во московски Спартак, вчера трансфер направи и Латвиецот Даинис Криштопанс кој е нов играч на берлински Фихсе. Вардар в сабота без овие двајца ќе има тешка задача против украинскиот тим.
„Си замина важен играч и да бидеме реални, Вардар не е ист со и без него. Наше е да се бориме, да пробаме да победиме. Тешко е, но проблемите не се нови. Се надевам дека пред полна сала ќе одиграме добар натпоревар“, рече Стоилов на денешниот прес.
Вардар пет кола по ред нема победа во Лигата на шампиони од кои 4 порази и едно реми. Сега во „Јане“ доаѓа последнопласираниот Мотор, а победата е императив за да се задржат шансите за пласман во осминафиналето.
„Ова можеби се последните натпревари за нас тука. Нам никој ништо не ни кажува. Ние сме европски шампиони, а односот кон нас е смешен. Ќе видиме што ќе се случи. Наше е да дадеме сѐ од себе, да го победиме Мотор, но реално сега каква што е работата во прашање е доведена и титулата во Македонија“, истакна Стоилов осврнувајќи се на финансиските проблеми и наводното ново откажување на газдата Сергеј Самсоненко.
Натпреварот се игра в сабота со почеток од 17.30 часот.