Цената на нафтата падна на светските берзи минатата недела, по снажниот раст една недела претходно.
Причината за падот се сомнежите и загриженоста на инвеститорите дека побарувачката ќе продолжи да слабее поради вториот бран на пандемијата со коронавирус.
Цената на барел нафта на лондонската берза минатата недела падна за 2,9 отсто на 41,92 долари, додека на американската берза барел нафта се продаваше по цена од 40,25 долари што е пад за 2,1 отсто.
Падот на цената најмногу се должи на стравувањата на инвеститорите дека ќе следат нови рестриктивни мерки во вториот бран од пандемијата, што ќе ја намали побарувачката за нафта.
Некои европски земји бележат нови рекорди на новозаболени, како Франција и Велика Британија, поради што воведуваат нови мерки за социјално изолирање.
Во САД вкупниот број на заразени досега во пандемијата надмина 7 милиони, а бројот на починати од COCID-19 достигна 200.000, што е највисок број на смртни случаи во светот.