Судијата ја „сецна“ Звезда во 94-та минута, коментаторот урлаше: Зошто? Зошто?

Црвена звезда во два драматични натпревари испадна од Милан во првата нокаут-фаза од Лига Европа.

Шампионот на Србија одигра 2:2 со славниот клуб во Белград, и 1:1 во Милано, па беше елиминиран поради повеќе примени голови на домашен терен.

„Можевме да поминеме. Несреќен пенал, поништен гол... Лут сум поради црвениот картон затоа што се подготвувавме последните десет минути да ги нападнеме целосно“, изјави тренерот на Звезда, Дејан Станковиќ.

Судијата синоќа особено ги налути белграѓани. Ја продолжи играта три минути, Звезда се избори за корнер во 93:04, а судијата прво им покажа на играчите на српскиот шампион да изведат корнер, но неколку секунди подоцна свирна крај.

„Ќе има корнер, ќе има корнер ... Не, неверојатно. Зошто Шпанецот го прави ова? Не му е верно на Станковиќ, не им е верно на играчите на Звезда. Треба да се зачуваат нервите во ваква ситуација, Се надевам дека зачувавте, драги гледачи“, урлаше коментаторот на српскиот Arenasport во тие моменти.

„Зошто? Зошто?“, повторуваше тој во неверување.

„Жал ми е за тој корнер, но нема да плачам. Остави нѐ да го изведеме корнерот. На Милан сигурно ќе му беше дозволено. Како и на другите клубови на ова ниво. Дајте ни го тој корнер како награда за момците за сè што направија“, разочаран беше и Станковиќ, кој веднаш по судиската одлука излета на теренот и почна да ги смирува своите фудбалери.