Ако сте долгогодишен љубител на видеоигри, а веќе сте на возраст да имате деца, голема е веројатноста дека нема да може да ги играте со вашите деца видеоигрите од вашето детство.
Прво, тешко е да го најдете хардверот за играње, а уште потешко е да ги заинтересирате денешните деца за осумбитни човечиња и конзолите од минатиот век.
Видеоигрите кои во својот оригинален облик преживуваат неколку генерации се исклучително ретки, а Super Mario Bros. е една од игрите која и по 35 години од појавувањето нема изгубено на свежина и подеднакво им е забавна и на носталгичарите и на младите гејмери.
Super Mario Bros. се појави во јапонските продавници во септември 1985 година и засекогаш го смени светот на видеоигрите.
Не е претерување да се каже дека токму водоинсталатерот мустаклија ја спаси гејминг индустријата која по неверојатниот првичен залет за кратко време удри во ѕид и почна да попушта под тежината на хиперпродукцијата, површноста и потпирањето на истрошени идеи.
Марио ја сврти наопаку оваа индустрија, постави нови правила и со време стана поп икона на исто ниво со Мики Маус, заштитно лице на Nintendo и една од најголемите медиумски франшизи на сите времиња. Неговиот творец, јапонскиот гениј Шигеру Мијамото стана спасителот на цела индустрија и човек чиј секој следен чекор се следи со големо внимание.
Куриозитет за Марио е дека на почетокот, кога се појавил како лик во играта Donkey Kong бил градежен работник чија мисија е да ја спаси девојката од Донки Конг. Дејството се случуваше на градилиште и тоа имаше смисла, а пнатаму цевките станаа составен дел на играта, па Марио стана водоинсталатер.