Челниците на Светската здравствена организација (СЗО) вчера повторно апелираа до луѓето да не носат маска за лице освен ако не се заразени со коронавирусот или не се грижат за лице болно од Covid-19.
Директорот на СЗО за вонредни ситуации Мајкл Рајан изјави дека носењето маска за лице, особено во случај на неправилно користење, може да направи повеќе штета отколку корист во борбата против ширење на коронавирусот.
Рајан повтори дека ставот на СЗО е дека маска треба да носат само луѓето кои се болни за да не го шират вирусот, како и здравствените работници на кои маските им се неопходни за работа.
„Нема конкретни докази што укажуваат дека масовното носење маски има каква било корист. Напротив, има докази што укажуваат на спротивното“, рече Рајан.
„Тука е и проблемот со недостигот на маски и друга медицинска опрема. Луѓето кои се најмногу изложени на ризик се здравствените работници кои секоја секунда од секој работен ден се изложени на вирусот. Помислата дека за нив би снемало маски е ужасна“, рече тој.
Епидемиолозите исто така укажуваат дека е важно да им се даде предност во носењето маски на оние на кои тоа им е најпотребно, односно здравствените работници на прво место.
