Глобалната пандемија на новиот коронавирус се забрзува, при што вчера беа регистрирани 150.000 нови случаи – најмногу во еден ден, изјави денеска генералниот директор на Светската здравствена организација (СЗО), Тедрос Аданом Гебрејесус.
„Речиси половина од пријавените случаи се од американскиот континент“, рече тој на виртуелниот брифинг.
„Светот е во нова и опасна фаза… вирусот сѐ уште се шири брзо, тој се уште е смртоносен и повеќето луѓе сѐ уште се подложни на заразување“, истакна Тедрос.
Тој рече дека заштитата од вирусот е должност на секој од нас, со почитување на пропишаните мерки за заштита – носење маска, држење дистанца, често одржување хигиена.
„Навистина можеме да го држиме вирусот на дистанца само со правење на овие основни работи, со тоа што ќе сфатиме дека ова е сечија должност и секоја индивудуа треба да води грижа прво за своето здравје, а потоа за своите блиски. Треба да се грижиме и за другите. Само така можеме да го зауздаме овој вирус“, апелираше Тедрос.
