Тулио де Оливеира, директор на Центарот за одговор на епидемијата и иновации во Јужна Африка, на претставниците на СЗО им ја пренесе својата загриженост во врска со новата варијатна на коронавирус Б.1.1.529, за која се стравува дека е досега најлошата идентификувана варијанта на вирусот.
-СЗО одлучи да одржи вонредна седница, изјави Де Оливеира за Financial Times.
Експертите на СЗО ќе разговараат дали новиот вид треба да се дефинира како нешто што предизвикува „загрижување“ или како варијанта „од интерес“.
За време на вчерашната прес-конференција, Тулио де Оливеира изјави дека новата варијанта има многу голем број мутации, што носи ризик од брзо ширење на болеста. Според последните податоци, оваа нова варијанта на коронавирусот во Јужноафриканска Република е дијагностицирана кај вкупно 77 лица.
Исто така, новиот сој бил дијагностициран кај четири лица во Боцвана и едно во Хонконг (лице кое дошло од Јужна Африка).
Светските лидери веднаш реагираа на веста за појава на нова варијанта, најавувајќи нови мерки на претпазливост и ограничувања за патување, додека берзите ширум светот забележаа пад предизвикан од неизвесноста.
Д-р Марија ван Керков, технички лидер на СЗО за COVID-19, на вчерашната прес-конференција кажа дека уште не се знае многу за оваа варијанта.
-Тоа што го знаеме е дека оваа варијанта има голем број мутации. Загриженоста е дека кога имате толку многу мутации, може да влијае на тоа како се однесува вирусот, рече Ван Керков.