Светската здравствена организација соопшти дека уште ги испитува податоците за руската вакцина Sputnik V, потребни за одобрување за итна употреба против коронавирусот.
Ова разјаснување следи откако рускиот министер за здравство, Михаил Мурашко, изјави дека административните прашања се меѓу главните препреки во процесот на одлучување на СЗО, околу одобрувањето на Sputnik V.
Одобрувањето би било знак на меѓународна доверба во вакцината по ригорозниот процес на испитување, а би можело да го отвори патот за вклучување на вакцината во КОВАКС програмата.
„Како и со другите кандидати за вакцина, СЗО продолжува да ја проценува вакцината Sputnik V за различнИ производствени погони и ќе ги објави одлуките за одборување за итна употреба кога сите податоци ќе бидат расположливи и испитувањето ќе биде завршено“, стои во соопштението на СЗО.
Целта на процесот за одобрување на вакцината за итна употреба е да се забрза рамноправниот пристап на вакцините за да се спасат повеќе животи и пандемијата да се стави под контрола.
