Меѓународната експертска мисија во Вухан заклучи дека најверојатно вирусот SARS-CoV-2 преминал од лилјаци на луѓе преку некое друго животно. Скоро целосно е исклучена можноста дека вирусот „избегал“ од некоја лабораторија, пренесе CNN.
Коронавирусот веројатно е пренесен од животни на луѓе, а почнал да се шири не повеќе од месец или два пред тоа да биде забележано во декември, 2019 година. Најмала е веројатноста дека потекнува од лабораторија.
Ова е заклучокот на заедничкиот меѓународен тим на Светската здравствена организација во нацрт извештајот за истрагата на потеклото на коронавирусот, а чии заклучоци ги објави CNN. Извештајот денеска треба да биде официјално претставен.
Според него, можни се четири извори, а најверојатното сценарио е дека вирусот е пренесен преку посредство на диво животно кое било заробено и потоа одгледувано на фарма. Меѓутоа, истрагата не откри кое е тоа животно заразено од лилјак, кој се смета за најверојатен извор на вирусот.
Таканаречениот можен среден домаќин на коронавирусот и понатаму е непознат, се наведува во текстот.
Следната веројатност е директен пренос од животни за кои е познато дека носат сличен коронавирус, како лилјак или панголин. Извештајот наведува дека е можен, но не и веројатен, пренос од смрзната храна, а најмалку е веројатно дека вирусот потекнува од лабораторија.