Шефовите на ФБИ и МИ5 предупредија на порастот на кинеската економска шпионажа на Запад во реткото заедничко обраќање во центарот на британското разузнавање во Лондон, додека Пекинг ги отфрли обвинувањата како неосновани.
Говорејќи пред претставниците на деловниот свет во Темза Хаус, генералниот директор на МИ5, Кен Мекалум и директорот на Федералната полиција на САД, Крис Вреј, тврдеа дека заканата од кинеските шпиони продолжува да расте.
Според Мекалум, британската домашна разузнавачка служба МИ5 ги засилила своите операции поврзани со Кина.
„Денес спроведуваме седум пати повеќе истраги поврзани со Кина отколку во 2018 година“, рече тој.
Кинеските разузнавачки служби работат бавно и трпеливо
Тој додаде дека кинеските разузнавачки служби работат бавно и трпеливо и дека малкумина се свесни дека се цел на нив.
„Во моментов на британско тло се случуваат непријателски активности“, рече тој, додавајќи дека на мета се знаењето, технологијата, истражувањето и слично.
Вреј додаде дека кинеската закана е „сложена, постојана и сеприсутна“, опасна за САД и Велика Британија, но и за другите сојузници. Кина е „решена да ја украде вашата технологија (...) и да ја користи за да ги поткопа вашите активности и да доминира на вашиот пазар“, рече тој.
Мекалум и Вреј, исто така, предупредија дека кинеската инвазија на Тајван значително ќе ја наруши светската трговија и индустрија.
Тие ги повикаа претставниците на деловниот свет да бидат внимателни и да укажуваат на можни закани.
„Кинеската комунистичка партија е заинтересирана за нашите демократски, медиумски и судски системи. За жал, не да ги имитира, туку да ги користи во своја полза“, рече Мекалум.
Пекинг ги отфрла обвинувањата
Пекинг, преку својата амбасада во Лондон, ги отфрли тие обвинувања, оценувајќи ги како „неосновани“.
„Наводните афери за кои зборуваа се обични димни завеси“, напиша портпаролот на кинеската амбасада во Обединетото Кралство во соопштението објавено на веб-страницата на амбасадата.
„Тие шират секакви лаги за Кина за да го оцрнат политичкиот систем на Кина, да го зголемат антикинеското расположение и исклученоста и да го пренасочат вниманието на јавноста и да ги прикријат сопствените срамни постапки“, додаде тој.
