Со „златен“ гол на продолженија Тампа Беј Лајтнинг го совлада Далас Старс со 5:4 во крајно неизвесен натпревар и поведе со 3-1 во партии во Стенли куп финалето.
Прв поведе Далас и тоа со 2:0 со головите на Јон Клињбериј во 8. и Џо Павелски во 19. минута, а веднаш во наредната Тампа намали преку Брејден Поинт триесетина секунди пред да заврши првата третинра.
Истиот играч во 3. минута од втората израмни на 2:2 искористувајќи го моментот на играч предност откако Џејми Олесијак беше исклучен. Сепак, пет минути подоцна Кори Пери погоди за ново водство на „Ѕвездите“ од 3:2. Тампа уште еднаш пред финишот на третината постигна гол, повторно со играч повеќе бидејќи Ендрју Кољани доби две минути ладење. Стрелец беше Јани Гурд.
Во 7. минута од последната третина Александер Килорн погоди за прво водство на Тампа на овој четврти натпревар, но Павелски во 12. минута се погрижи резултатот да гласи 4:4.
Бидејќи до крајот никој не успеа да постигне победнички гол, натпреварот замина во продолженија. Таму во 7. минута Тампа по трет пат денеска искористи исклучување на противнички играч, овој пат тоа беше Џејми Бен, па со голот на Кевин Шатенкирк во точно 6 минути и 34 секунди се огласи сирената за крај.
Иако финалната серија со победа ја отвори Далас, хокеарите на Тампа со три последователни победи сега водат со 3-1 во партии и се на чекор до пехарот. Наредниот петти натпревар се игра исто така во „Роџерс Плејс“ арената во Едмонтон, Канада, а Тампа ќе ја брка победата со која ќе ја освои титулата, што би била втора во нејзината историја откако прв пат триумфираше во 2004.
Иако на минатиот натпревар на мразот се врати и македонскиот Канаѓанец Стивен Стамкос, кој постигна и гол, на овој натпревар доби одмор и се очекува да биде спремен за вечер во 2 часот по полноќ по македонско време.