Рудар во Танзанија, кој во јуни преку ноќ стана милионер откако продаде два скапоцени камења вредни 3,4 милиони долари, сега пронајде уште една скапоценост, вредна 2 милиони долари.
Рударот Саниниу Лаизер третиот скапоцен камен го пронајде во северниот дел на Танзанија. Станува збор за танзанит тежок 6,3 килограми. Лаизер го продал за 2 милиони долари, а истиот ќе биде употребен за правење накит, пренесе BBC.
Танзанитот е меѓу најретките скапоцени камења, го има само во северна Танзанија, а локален геолог прогнозира дека целосно ќе исчезне за помалку од 20 години. Овој скапоцен камен е интересен поради различните бои меѓу кои се зелена, црвена, виолетова и сина. Вредноста се проценува според тоа колку е редок по неговата боја и чистина.
Претходно Лаизер продаде два танзанити, еден тежок 9,2 килограми и уште еден од 5,8 килограми. Овој рудар е татко на повеќе од 30 деца, а од новата заработка планира да направи училиште и болница за неговата заедница во Симанџиро.
Претходно изјави дека парите нема да го променат неговиот животен стил и дека ќе продолжи да се грижи за неговите 2.000 крави.